Hugot nga gina-monitor karon sang Philippine Institute of Volcanology and Seismology (PHIVOLCS) ang nagapadayon nga serye sang linog sa west lower flanks sang Kanlaon Volcano sa Negros Island.
Ang tremor ang nagsugod alas-4:03 kahapon sang hapon sa La Carlota City nga may magnitude 3.7.
Narekord naman ang magnitude 4.6 nga linog takna ala-1:01 kaina sang kaagahon sa amo man gihapon nga ciudad.
Nabatyagan ang Intensity V sa Kanlaon City, Intensity III sa Bago City, Intensity II sa Sipalay City kag Intensity I sa Iloilo City.
Sa pinakaulihi nga data, kabug-usan nga 81 events ang narekord sa Bulkan Kanlaon.
Ginpasiguro naman sang PHIVOLCS ang publiko ilabi na ang mga pumuluyo sa palibot sang Kanlaon nga ginatutukan na nila ang kondisyon sang bulkan kag nagpasalig man ang ahensya nga gilayon nila nga ipahibalo ang mga development diri.
Samtang, ginpanugyanan naman ni La Carlota City Mayor Rex Jalando-on paagi sa Facebook post sini ang iya mga pumuluyo nga mag kalma, magpangamuyo kag mangin alerto lamang kasunod sang serye sang linog nga narekord sa ila lugar.
