KUWAIT – Isa ka Pinoy nurse sa Kuwait ang nagtaliwan samtang ginabulong sa intensive care unit (ICU) bangud sa coronavirus disease 2019 (COVID-19).
Ini ang ginpahayag ni Richel Labrador Huey, Bombo Correspondent sa nasambit nga pungsod.
Suno kay Huey, ginkilala ang biktima kay Arnel Yenuere, isa ka nurse nga sa ward naka-assign.
Suno sa iya, bangud nga nagtaliwan ini tungod sa COVID-19, indi na sarang nga madala pabalik sa Pilipinas ang lawas ni Yenuere kag didto na lang ilubong sa Kuwait.
Gindugang man sang OFW nga may isa man ka Filipino nga naghikog bangud sa depression tuga sang malapit tatlo ka bulan nga nadulaan sang ubra bangud sa pandemic.
Suno sa iya, ang nasambit nga Pinoy nga wala ginhingadlan ang tatlo ka bulan nga “no work, no pay” gani posible nga wala sini nasarangan ang kabudlay kag naghikog.
Apisar sini, suno kay Huey, ang mga Filipino ang pinakadutay nga lahi nga nagakadapuan sang virus sa pungsod.
Gindugang man sini nga indi lang mga Pinoy ang mga nagakadepress kag nagahikog bangud masami ini nga nagakatabo sa mga iban nga lahi nga yara sa Kuwait.
Sa latest nga data, suno sa iya, may yara sang kabug-usan nga 41,291 ka mga kompirmado nga kaso sang COVID-19 sa pungsod bangud sa 641 ka mga dugang nga kaso nga narekord kahapon.
Nadugangan man sang apat ka mga fatalities gani nagdangat na ang kabug-usan sa 330 samtang 31,779 na ang mga nakarecover sa balatian matapos marekord ang 530 ka dugang nga mga nag-alayo.
