Ginkumpimar sang chairman sang Committee on Education sa Sangguniang Panlungsod sang Bacolod nga P125 million ang pondo nga gin-propose para sa kinahanglanon sa nagkalain-lain nga modalities sa pagbukas sang klase sa bulan sang Agosto.
Suno kay Councilor Renecito Novero, nagsapol sang Lunes sanday Bacolod City Mayor Evelio “Bing” Leonardia upod si Bacolod Schools Division Superintendent Gladys Amelaine Sales kag iban pa nga mga city officials kun sa diin ginpresentar ni Sales ang nagkalain-lain nga mode of learning sa pagbukas sang klase sa Agosto 24.
Santo sa proposal sini, kapin P125 million ang pondo nga kinahanglanon.
Lakip na diri ang P5 million para sa pagpatukod sang tower kun sa diin may yara sang apat ka studios nga may low FM frequencies.
Ang kada studio ang maga-cater sang grade level kada adlaw.
P11 million naman ang ginpain para sa internet access sa mga eskwelahan.
Samtang, suno kay Novero, dako gid ang makadto nga pondo para sa pagbakal sang mga gadgets sang mga manunudlo.
Suno sa konsehal, ang amo nga pondo ang magahalin sa special education fund sang ciudad.
Gin-athag man sini nga magapatigayon pa sila sang pagsinapol subong nga adlaw sa local school board agud diskusyunan kun practicable ini ukon indi.
