Ginkumpirmar ni Negros Occidental Governor Eugenio Jose Lacson nga magahatag ang Department of Health sang lima ka milyon ka pesos para sa operasyon sang Teresita Lopez Jalandoni Provincial Hospital Molecular Laboratory.
Suno kay Lacson, ang 5 million pesos ang ibakal sang dugang nga mga test kits nga gamiton para sa locally-stranded individuals kag repatriated OFWs.
Sa session sang Martes, ginhatagan sang Sangguniang Panlalawigan sang otoridad si Lacson nga mapirmahan ang memorandum of agreement sa tunga sang provincial government kag sang DOH tuhoy sa 5 million pesos nga donasyon sang ahensya.
Sa tion nga masumiter na sa DOH ang kopya sang MOA suno kay Lacson, ginalauman nga magasulod naman ang pondo.
Suno sa gobernador, dako na ini nga bulig sa molecular laboratory bangud sarang na ini makabakal sang 50 mil ka mga test kits.
Nahibaluan nga tanan nga mga LSI nagikan sa Cebu kag Metro Manila ang ginapaidalom sa test.
Kaina sang udto, may siyam naman ka Negrense LSI nga nagpositibo sa COVID 19.
Bangud sini, nagdangat na sa 77 ang COVID cases sa Negros Occidental.
