Nagpanugyan ang Public Relations Officer sang Central Negros Electric Cooperative (CENECO) nga itawag sa opisina kun wala nakabaton sang bill sang kuryente ukon nakabaton man sini apang basa ang papel agud mahibaluan kun kay sin-o nahatag ang bill sang kuryente.
Sa interview sang Bombo Radyo Bacolod kay CENECO Public Relations Officer Malou Paroco, ginpahayag sini nga naaddress na sang kooperatiba ang reklamo angot sa mga nadula kag nabasa nga bill bangud sa indi pagsunod sang mga nagapanagtag sang instruction nga dapat ibutang sa agogo wrapper ang bill kag ihigot sa gate sang tag-iya agud indi madula ukon mabasa sa tion nga mag-ulan apang may yara gid nga wala nagasunod nga nagresulta sa pagreklamo sang mga konsumidor.
Suno kay Paroco, mahimo nga matawgan sang konsumidor ang opisina sa numero nga 458 6777 loc 1212 agud mahibaluan kun sa diin nga lugar naghalin nga reklamo kag sin-o nga tawo ang meter reader kag nagapanagtag sang bill.
Suno pa diri, wala pa silang concrete nga adlaw sang pagpang-utod sang kuryente apang nagapadayon ang pagbaton sang staggered payment.
