Nagdangat na sa 12 ang mga doktor sang Western Visayas nga nagpositibo sa coronavirus disease 2019 (COVID-19).
Sa interview sang Bombo Radyo Bacolod kay Dr. Renilyn Reyes, focal person sang Department of Health Region 6, ginpahayag sini nga apat ka mga doktor ang nauna nga narekord nga nagpositibo sa COVID-19 apang kahapon kag sang tinalikdan nga adlaw, nadugangan ini sang walo nga lunsay nagikan sa St. Pauls Hospital sa Iloilo City.
Suno kay Reyes, magluwas sa 12 ka mga doktor, may yara pa gid sang 11 ka mga medical frontliners nga nagpositibo sa balatian.
Ini ang ginalakipan sang anum ka mga nurse; isa ka radio technician; isa ka medical technologist; kag tatlo ka mga midwives.
Sa karun nagapadayon pa ang contact tracing sa iban pa nga mga medical personnel sang St. Paul’s Hospital kag may ginapaabot pa sila nga mga resulta sang swab tests.
Suno diri, nagacoordinate ang nasambit nga ospital, ciudad sang Iloilo kag DOH tuhoy sa mga tikang nga ila pagahimuon apang sa karun, ginakompleto pa ang operasyon kag contact tracing kag ireview pa ang ila mga protocol tuhoy sa disinfection kag contamination antes iresume ang operasyon sang ospital.
