Naghimo na ang Sangguniang Panlungsod sang Bacolod sang sulat para sa National Telecommunications Commission (NTC) angot sa pagpangayo sang special permit nga magpatindog sang radio station nga gamiton sang mga manunudlo sa pagtudlo sa mga estudyante.
Sa interview sang Bombo Radyo Bacolod kay Bacolod City Councilor Renecito Novero, chairman sang committee on education sa SP, ginpahayag sini nga matapos ang madugay nga pagtuon kag diskusyon, nagdecision ang local school board nga magpatindog sang 100 watts radio FM station agud gamiton bilang learning modality para sang School Year 2020-2021.
Nagpasar man sila sang resolusyon angot sa paghingyo sa NTC agud nga hatagan sang special permit ang Department of Education (DepEd) Bacolod agud indi na mag-agi sa congressional franchise.
Suno kay Novero, sa tion nga matigayon ang pagtukod sang nasambit nga radio station, ini ang mas barato komparar sa iban nga mga modalities.
Apisar may yara na sang Radio FM system na nga gamiton wala man ginadula sang school board ang paggamit sang online apang kinahanglanon man nga pangitaan sang paagi ang pagpapadasig sang internet connection kun ini man ang gamiton.
