Lima ka mga balay sa banwa sang Valladolid ang gintupok sang kalayo kadungan sang sunog nga nagluntad sa Purok Dapdap, Brgy. Poblacion, Valladolid pasado alas 6:00 kagab-i.
Sa interview sang Bombo Radyo kay Mayor Enrique Miravalles, isa ka wiring sa isa ka balay ang gintunaan sang kalayo nga nagtupok sa lima ka mga panimalay nga naga-ililikit kag human sa light materials.
Suno kay Miravalles, alas 6:30 sang nagluntad ang sunog apang gilayon naman ini nga nafire-out bangud sa bulig sang mga fire station sang San Enrique, Bago kag Pulupandan, subong man sang Chamber Volunteer Fire Brigade.
Nagapasalamat man ang alkalde nga wala sang may nasamaran ukon napilasan nga pumuluyo.
Suno sa iya, pangitaan nila anay sang temporaryo nga pasilungan ang mga pamilya nga nawad-an sang puluy-an kag arigluhon subong nga adlaw kun ano nga bulig ang nagakaigo nila nga mahatag.
Nagpanugyan man si Miravalles sa mga pumuluyo nga tsekyarun gid permi ang ila mga wirings agud indi makatuga sang halit sa panimalay.
