Anom ka mga persona nga sakay sa isa ka tricycle lakip na ang driver sini ang pilason matapos makabunggo sa sugata sini nga dump truck sa National Highway, Rizal St., Barangay Poblacion banwa sang San Enrique kahapon.
Sa interview sang Bombo Radyo Bacolod kay Police Capt. Renante Salgado, hepe sang San Enrique Municipal Police Station, padulong kuntani sa Valladolid ang tricycle bangud may sakay ini nga duha ka mga pasyente.
Nagagwa sa ila imbestigasyon nga gin-agaw sang tricycle ang lane sang dump truck nga nagadalagan from north to south direction.
Nakabunggo ang tricycle nga ginamaneho ni Chispher Puasan, 19-anyos sang amo nga barangay sa nawala nga bahin sang bumper sa atubangan sang dump truck nga nagresulta sa pagtabog sang mga pasahero sini kag subong man niya.
Magluwas diri, nalab-ot naman sang dump truck ang buli sang mini dump truck nga nagapondo sa higad sang dalan.
Gilayon nga gindala sa malapit nga mga balay-bululngan ang mga biktima apang ginsaylo naman sa ciudad sang Bacolod para sa dugang nga pagbulong.
Suno kay Salgado, yara na sa maayo nga kahimtangan ang lima ka mga pasahero apang naka-comatose naman karon si Puasan.
Samtang, yara naman sa kustodiya sang San Enrique Municipal Police Station ang driver sang dump truck nga si Gil Villegas, 59-anyos kag residente sang Barangay Taculing, Bacolod City.
Nahibaluan nga ginapanag-iyahan sang Silver Dragon Construction Inc. ang amo nga dump truck.
