Duha ang patay samtang lima ang pilason sa pagbunggo sang kotse sa isa ka balay kag duha ka kahoy sa Bago City, Negros Occidental pasado alas 10:00 ang takna kagab-i.
Sa interview sang Bombo Radyo Bacolod kay Police Major John Joel Batusbatusan, hepe sang Bago City Police Station, padulong sa Brgy. Napoles ang Toyota Vios nga ginamaneho ni Joseph Bagatela sang Brgy. Villamonte, Bacolod City kag kaupod sini ang anom ka mga pasahero nga lunsay mga lalaki.
Pag-abot sa Prk. Mainugyunon, Brgy. Napoles, nakabunggo ang kotse sa balay kag nagderecho sa puno sang paho kag mahogany.
Bangud sa impact sang pagkabunggo, wasak ang kotse kag nagresulta sa kamatayon nanday Ronald Sudoy sang Brgy. Calumangan kag Jomari Udani sang Brgy. Napoles lunsay sa ciudad sang Bago.
Samtang, pilason naman ang driver nga si Bagatela; Raffy Jalea, 28 anyos; Rammel Jalea; Jody Abello kag Jojet Quilantang.
Nakaagom naman sang menor nga pilas ang isa ka bata sa balay nga nabungguan sang salakyan.
Suno kay Batusbatusan, una nga gindala ang mga nagkasalamaran sa Bago City Hospital apang ginsaylo kanday Abello, Quilantang kag Bagatela sa Corazon Locsin Montelibano Memorial Regional Hospital.
Suno sa hepe, nakainom si Bagatela sang makahulubog nga ilimnon kag madasig ang iya pagmaneho.
