Mangin ang pinuno sang City Disaster Risk Reduction and Management Office sang ciudad sang Silay ang natingala kun ngaa nagpositibo sa COVID-19 ang isa ka 45-anyos nga lalaki nga personnel.
Sa interview sang Bombo Radyo kay CDRRMO Head Alexander Muñoz, ginpahayag sini nga isa ka responder driver ang nasambit nga personnel kag wala ini naga-involve sa grupo sang mga responder nga nagasugat kag dul-ong sa mga locally stranded individuals.
Suno kay Muñoz, ang grupo sini ang nagaresponde sa mga emerhensya, aksidente kag nagadala sa mga pasyente sa mga balay-bululngan gani natingala ini kun paano sini nakuha ang balatian bangud indi man ini imbolbado sa mga LSIs.
Suno sa iya, Hunyo 26 sang ginpaidalum sa swab test ang tanan nga miyembro sang CDRRMO kag mangin ang mga personnel nga yara sa idalum sang grupo nga nagarespondi sa mga LSIs ang nagnegatibo sa virus.
Sa 50 ka mga personnel, ang 45-anyos nga lalaki lang gid ang nagpositibo sa test.
Suno sa pinuno, ginpaidalum na sa rapid test ang team sang pasyente kahapon samtang karun nga adlaw naman kuhaan liwat sang test ang tanan nga miyembro sang CDRRMO.
Suno sa iya, single ang nasambit nga pasyente apang padayon pa nila nga ginahibalo kun may mga himata ini nga iya nakacontact.
Sa karun, nakaquarantine ini sa EB Magalona Healing Center kag nagapabilin nga asymptomatic.
