P80 million ang kabug-usan nga budget nga ginpropose sa purchase request nga ginpasa sang Sangguniang Panlungsod sang Bacolod para sa pagbukas sang klase sa Agosto 24.
Sa interview sang Bombo Radyo kay Bacolod City Councilor Renecito Novero, chairman sang committee on education sa SP, ginpahayag sini nga sa ila ginpatigayon nga pamulong-pulong tuhoy sa pagbukas sang klase sa Agosto, nagapreparar gihapon ang Department of Education ilabi na nga distance learning ang pamaagi sang pagtudlo sini nga tuig.
Suno kay Novero, ang P80 million nga budget nga ila ginpropose ang ginalakipan sang 200 ka mga units sang laptop nga nagabalor P35,000 ang kada isa kag may kabug-usan nga budget nga P7 million; 80 ka units sang special laptops nga nagabalor P90,000 ang kada isa kag may kabug-usan nga budget nga P7,200,000; 17 ka mga units sang digital duplicator nga nagabalor P110,000 kada isa kag may kabug-usan nga P1,870,000; color ink nga nagabalor P150,000 tubtob P185,000; 12 ka units sang tablets nga nga nagabalor sang P27,000 kada isa kag may kabug-usan nga budget nga P324,000; 1000 ka units sang tablets nga nagabalor P8,000 ang kada isa kag may kabug-usan nga P8 million nga budget.
Suno sa konsehal, ang mga laptops kag tablets ang ipagamit sa mga pinili nga mga manunudlo kag mga estudyante nga napaidalum sa special classes.
Gindugang man sini nga may yara sang P2 million nga budget para sa mobile running hub classroom nga magalibot sa nagkalain-lain nga mga barangay nga magamit bilang mobile learning classroom kag P7 million nga budget para sa radio tower nga may lima ka mga channels kag may yara sang 100 watts.
Suno sa iya, nagrequest pa sila sang special permit sa National Telecommunications Commission agud nga maka-operar sang radio channel para sa edukasyon.
Apang apisar sang mga preparasyon, nagapati gihapon si Novero nga posible nga indi pagpahanugutan ni Presidente Rodrigo Duterte ang pagbukas sang klase bangud sa pagdayon ng pagdamo sang kaso sang COVID-19 sa pungsod kag ipaiway na lang ini dasun nga tuig.
