Padayon pa ang search and rescue operations sang Coast Guard Station Negros Occidental sa isa ka mangingisda matapos nga nagbaliskad ang banca nga ginasakyan sini upod ang iya nga utod sa baybayon sang Brgy. 1, banwa sang Ilog, Martes sang gab-i.
Sa interview sang Bombo Radyo kay Commander Jansen Benjamin, pinuno sang Coast Guard Station Negros Occidental, ginpahayag sini nga sang Hulyo 7, pasado alas 11:00 sang gab-i, nagapangisda ang mag-utod nga sanday Ivar Avansenia, 35 anyos kag Isagani Avansenia, 32 anyos sang nagsangit ang ila bangka sa isa ka wala nahibaluan nga klase sang higot kag hinali lang nga nagbaliskad.
Suno kay Benjamin, nakabuya sa sakayan si Isagani samtang nakakabit naman si Ivar.
Pagka-aga, nalabyan sang isa ka nagapangisda ang ila bangka sakay si Ivar kag gintabid ini pahigad samtang wala naman makit-an si Isagani.
Suno sa pinuno, posible nga mapadpad sa baybayon sang Himamaylan ang biktima gani ila naman nga gin-alerto ang mga nagabantay sa shorelines.
