Nagpaathag ang Central Negros Electric Cooperative (CENECO) angot sa brownout nga nagluntad kagab-i sa ciudad sang Bacolod kag pila ka mga lugar sa probinsya sang Negros Occidental nga sakop sini.
Sa Facebook page post sang CENECO, ila gin-athag nga bangud sa pagtripped sang Bacolod-Silay 69KV Line, naapektuhan ang feeders sa Burgos, Mt. View, Talisay kag Silay takna alas-8:35 kagab-i.
Samtang, bangud naman sa naglupok nga lightning arrester sang Globe tower sa Burgos St., Murcia, naapektuhan ang bilog nga banwa subong man ang Salvador Benedicto sang brownout takna alas-8:28 tubtob alas-9:05 kagab-i.
Nadulaan man sang suplay sang kuryente ang Alijis Feeder 1 takna alas-9:20 kagab-i.
Nahibaluan nga naka-eksperyensya sang pag-ulan nga may dala nga pagpangilat kag pagpanaguob ang ciudad sang Bacolod kag pila ka bahin sang Negros Occidental kagab-i.
