Nalakip ang duha ka kabataan sa 18 ka panibag-o nga kaso sang COVID-19 nga narecord sa probinsya sang Negros Occidental kahapon.
Nagpositibo ang anum ka mga locally stranded individual (LSI) nga residente sang San Carlos City, Negros Occidental nga ginalakipan sang 20 anyos nga babayi, 18 anyos nga babayi, 16 anyos nga lalaki, 12 anyos nga babayi, 6 anyos nga bata nga babayi kag ang isa ka tuig nga bata nga babayi.
Apat naman ang nagpositibo nga residente sa banwa sang La Castellana, Negros Occidental nga ginalakipan sang 55 anyos nga lalaki, 26 anyos nga lalaki, 25 anyos nga lalaki kag isa ka 21 anyos nga babayi kag lunsay mga LSI.
Nagdugang man sa kaso sang COVID-19 ang tatlo ka mga LSI nga naga-edad 24 anyos kag lunsay mga kalalakin-an nga residente sa banwa sang Himamaylan, Negros Occidental.
Nadugang man sa kaso ang 55 anyos nga babayi, residente sa Cadiz City, 39 anyos nga lalaki nga residente sa banwa sang Don Salvador Benedicto, 37 anyos nga lalaki nga residente sa banwa sang Calatrava kag 21 anyos nga lalaki nga residente sa banwa sang Binalbagan kag lunsay mga LSI.
Samtang isa naman ka 33 anyos nga babayi nga residente sa Kabankalan City ang kaupod nga nagpositibo nga indi isa ka LSI.
Ang mga pasyente ang yara sa mga quarantine facility sang probinsya.
Sa karon, nagdangat na sa 167 ang COVID-19 cases sa probinsya sang Negros Occidental samtang nagapabilin naman sa 52 ang siyudad sang Bacolod.
Sa kaangot nga balita, ginpasalig sang alkalde sang San Carlos nga yara sa quarantine facility ang anom ka locally stranded individual (LSI) nga panibag-o nga narecord nga kaso sang COVID-19 sa siyudad.
Suno kay San Carlos City Mayor Renato Gustilo, yara sa quarantine facility ang tanan nga mga LSI nga naga-abot sa probinsya santo sa guidelines.
Bangod naman sa mga nauna nga mga kaso sang COVID-19 sa siyudad, may pila naman ka mga barangay ang ginpaidalom sa lockdown.
Ginapatihan naman nga kalabanan nga mga nagpositibo ang nagikan sa Cebu.
May mga tikang naman nga ginapatigayon ang siyudad agud nga mahagan-hagan ang mga nagatabok nagikan sa Cebu bangod malapit lang ini.
Ang mga nagpositibo ang yara sa karon sa EB Magalona Healing Center kag ginapatigayon naman contact tracing.
Kun may makuha naman gikan sa contract tracing, gilayon sila nga ginatransfer sa mga eskwelahan nga ginhimu nga quarantine facility.
May gindugang naman nga 12 ka mga bunk house nga kada isa ang may 14 ka rooms kag 14 ka mga CR ang pagahimuon man nga panibag-o nga isolation facility.
Ginpaseguro naman sang alkalde nga ang tanan nga LSI ang nag-agi sa province.
Ginapatihan naman nga isa ka pamilya ang panibag-o nga mga kaso nga ginalakipan sang isa ka tuig nga bata kag yara na ang mga ini sa quarantine facility sang maggwa ang resulta nga positibo.
Suno sa alkalde, padayun pa sa karon ang contact tracing bangod may gina-alegar tagaBoracay kag tagaToledo, Cebu nga nakalusot sa siyudad.
Ang mga naka lockdown naman amo ang pila ka bahin sang Barangay 5 kag 6 nga yara sa 400 tubtob 500 ka mga kabalayan.
