Dugang nga mga motorista ang nagpanindugan nga tuman ka delikado para sa ila ang pagbutang sang barrier sa mga motorsiklo agud masiguro nga may yara sang physical distancing, santo sa mando sang national Inter-agency Task Force (IATF).
Sa interview sang Bombo Radyo kay Jay Ezard Pedrosa, Team Leader sang Phil. Road Sports Confederation, ginpahayag sini nga indi siya pabor sa pagbutang sang barrier sa motorsiklo ilabi na sa mga motorista nga nagagamit sang under bone bangud sa tion nga magpatughong ini sang gasolina, ginahakwat ang bangko kag sa idalom man sang bangko ginabutang ang tools nga indi madali-dali kuha kun may barrier sa tion sang emerhensya.
Delikado man suno sa iya kun may barrier sa tion nga agyan sang dalagko nga salakyan bangud mahimo nga matumba bangud man sa hangin nga gintuga sang naglabay nga salakyan.
Nagpasalamat ini nga ginpasugtan ang angkas apang wala ini nagapabor sa pagsulundan nga ipatuman.
Samtang, gintawag naman sang isa ka rider nga wala sang pulos ang pagbutang sang barrier bangud nagaupod man sa gihapon ang mag-asawa sa balay nga wala man sang barriers.
Suno kay Sheng Cordova, magluwas nga delikado bangud mahimo nga maaksidente ang pagbutang sang barrier, wala man sang gamit ini bangud nga sa tion nga mag-abot sa balay ang mag-asawa, wala man ang mga ini nagagamit sang barriers kag upod man sila kun magtulog kag magkaon.
Gani wala sini ginapaboran ang pagbutang sang barrier santo sa mando sang IATF sa tion nga mag-angkasanay.
