Ginkumpirmar sang alkalde sa banwa sang Murcia nga iya na ginbatak ang lockdown nga ginpatuman sa Purok New Site, Brgy. Minoyan matapos magpositibo sa COVID-19 ang isa ka 47-anyos nga lalaki nga residente nga empleyado kag driver sang Provincial Disaster Risk Reduction and Management Office (PDRRMO).
Ini ang kasunod sang pagnegatibo sa virus sang 23 ka mga naka-closed contact sa pasyente.
Madumduman nga ginpaidalom sa Extreme Enhanced Community Quarantine (EECQ) ang Purok New Site samtang Enhanced Community Quarantine (ECQ) ang iban nga bahin sang Barangay Minoyan.
Sa interview sang Bombo Radyo Bacolod kay Mayor Gerry Rojas, ginpahayag sini nga matapos maggwa ang negatibo nga resulta sang asawa sang pasyente sadtong Sabado, bangud ini nalang ang may yara sang pending test result sa 23 nga nacontact trace, gilayon siya nga nagdihon sang Executive Order nga nagakakas sang lockdown sa amo nga lugar.
Ginrelease man dayon ang mga ini sa quarantine facility kag ginpapauli samtang padayon naman nga naka-isolate ang pasyente.
Nagapasalamat man ini sa mga pumuluyo nga nagkooperar.
Iya man ginkumpirmar nga bangud sa mga negatibo nga resulta, wala sang local transmission sa banwa sang Murcia.
Samtang, liwat naman nga ginpahanumdom ni Rojas nga temporaryo nga ginsuspinder ang Market Day sa ila banwa agud malikawan nga maglapta ang coronavirus.
