Arestado ang isa ka dentista sa drug buybust operation sang Philippine Drug Enforcement Agency (PDEA) Negros Occidental sa Governor Lacson Street, Brgy. 12, Talisay City kagab-i.
Sa interview sang Bombo Radyo Bacolod kay PDEA team leader Agent Bamboo, ginpahayag sini nga masobra man duha ka semana nga ginsurveillance ang suspetsado nga ginkilala kay Dr. Michael Ordinario, 50 anyos kag residente sang nasambit nga lugar.
Nakuha sa paghinakop sini ang apat ka sachet sang suspected shabu kag ginabanta nagabug-at sang lima ka gramos kag nagabalor sang P30 tubtob P35 mil.
Dugang pa nga nakuha sa paghinakop sini ang iban pa nga drug paraphernalia.
Ginpahayag man ni Agent Bamboo nga nabaklan man sang PDEA agent ang doctor sang illegal nga druga.
Indi pa ini magpaposas bangud hugot nga nagpanginwala nga iya ang nakompiskar nga illegal nga druga apang nagkalma man ini pag-abot sang iya pamilya.
Ginapadalman man sang ahensya kun sa diin ini nagakuha sang supply bangud wala pa nila ini naimbestigaran sang maayo bangud nagapakuno-kuno nga nadulaan sang palangibutan.
Nakahunong ini sa karun sa Talisay City Police Station kag natalana nga pasakaan sang kaso nga pagbayolar sa Republic Act 9165 ukon Comprehensive Dangerous Drugs Act of 2002.
