Ginpasalig sang alkalde sang siyudad sang Talisay nga gindala na sa isolation facility ang mga himata sang apat ka tuig nga bata nga nagpositibo sa COVID-19.
Suno kay Mayor Nilo Jesus Antonio Neil Lizares III, ang Talisay City Patient No. 4 nga isa ka apat ka tuig nga bata sang isa ka locally stranded individual (LSI) nga may travel history nga nagikan sa Guimaras padulong sa Iloilo kag nagikan naman sa Iloilo nagpadulong sa Bacolod tinalikdan nga Hunyo 30.
Ang bata ang nagbyahe kaupod ang iloy kag utod padulong sa Purok Pasco, Barangay Zone 12-A.
Si Patient No. 4 kaupod ang iloy kag utod ang yara sa karon sa healing center samtang ginahulat ang resulta sang ulihi nga swab test.
Samtang sang yara sa home quarantine, ang apat ka tuig nga bata ang nagapuyo sa isa ka balay kaupod ang mga paryente.
Sa karon ang mga paryente sang pasyente ang nagapabilin nga asymptomatic apang gilayon naman nga gindala sa quarantine facility sang siyudad agud nga matapna ang paglapta sang virus.
Padayun naman nga ginapatigayon ang contact tracing kag rapid test sa mga nakaclose contact sa pasyente kag mga paryente sini.
Nahibaluan nga 12 ang nagdugang sa probinsya kun sa diin apat diri ang residente sang Talisay City.
Ini ang ginkilala nga mga bikers nga nakapalapit sa nagpositibo nga nurse nga nagatrabaho sa pribado nga ospital sa Bacolod.
Ginapanugyan naman ni Lizares nga magpabilin nga mangin mahinalungon kag vigilante ang mga pumuluyo kag indi pagkalipatan ang pagpangamuyo para sa mga pasyente, sa kada isa kasubong man sa kaayuhan sang siyudad.
Ginapangabay ni Lizares nga mangin mabaskog pa ang kada isa sa paglab-ot sang handom nga madaog ang balatian bangod mas mangin mabudlay pa ang mga masunod nga semana kag binulan.
