Nagsugod na abot ang pinakauna nga batch sang mga locally stranded individuals sa Bacolod-Silay Airport kahapon matapos ang duha ka semana nga pagsuspendi sa pagpasulod sang mga LSI sa ciudad.
Sa interview sang Bombo Radyo kay Councilor Cindy Rojas, chairman sang committee on locally stranded individuals, ginpahayag sini nga ginpapauli na ang mga LSIs nagikan sa Metro Manila nga wala nakasakay sa flights sang tinalikdan bangud sa suspension nga ginpatuman.
Suno kay Rojas, isa lang ka flight ang nakaschedule kada adlaw tubtob sa katapusan sang bulan.
Suno sa iya, ang schedule sang mga flights sa Philippine Airlines ang Hulyo 13, 17, 20, 24, 27 kag 31 samtang ang schedule naman sa Cebu Pacific ang magasugod sa Hulyo 14, 16, 21, 23, 28 kag 30.
Sa Philipine Air Asia, suno sa konsehal, ang magasugod sa Hulyo 18, 22, 25 kag 29.
Gindugang man sini nga masobra 200 pa ka mga LSIs nga yara sa quarantine facilities ang ginahulat ang swab results kag kun indi ini mag-abot sa Miyerkules, posible nga mapuno gid ang mga pasilidad.
Apang nagpasalig man ini nga makasarang pa nga makabaton ang mga pasilidad sang mga magaabot nga LSIs tubtob sa katapusan sang semana.
Samtang, extended naman tubtob Hulyo 15 ang suspension sang pagbaton sang mga LSIs sa Negros Occidental.
Sa interview sang Bombo Radyo kay Dr. Zeaphard Gerhart Caelian sang Provincial Incident Management Team, ginpahayag sini nga sa Hulyo 16 pa masugod pangbaton sang mga LSIs bangud sa Hulyo 15 man maexpire ang quarantine status sang probinsya.
Suno kay Caelian, lauman ang influx sang numero sang mga LSIs nga magapauli bangud sa duha ka semana nga pag-untat sang byahe.
Suno sa iya, nagapreparar naman ang probinsya sa pagbaton sang mga ini kag gina-amat-amat naman pangrelease ang mga LSIs nga yara sa quarantine facilities.
Gindugang man sini nga pag-abot sang mag LSIs, gilayon ang mga ini nga kuhaan sang swab test, ibutang sa quarantine facilities kag irelease kun magnegatibo ang resulta.
