Napulo ka locally stranded individuals nga nagpauli sa Negros Occidental ang nagpositibo sa COVID-19 samtang man yara naman sang isa ka indigenous case sa probinsya.
Suno sa COVID-19 case bulletin no. 110 sang Western Visayas, ang nagpositibo sa Negros Occidental ang ginalakipan sang 25 anyos nga babayi nga residente sang Kabankalan City; walo ka bulan nga bata nga lalaki kag residente sang banwa sang San Enrique; 36 anyos kag 54 anyos nga lalaki nga lunsay mga residente sang San Carlos City; kag 19 anyos nga babayi nga residente sang La Castellana.
Nagpositibo man sa COVID ang 42 anyos nga lalaki nga residente sa Escalante City; 32 anyos nga babayi nga residente sang EB Magalona; 30 anyos nga babayi nga residente sang Victorias City, 34 anyos kag 31 anyos nga mga lalaki nga lunsay mga residente sang Sipalay City.
Sila ang lunsay locally stranded individual (LSI).
Isa naman ka 20 anyos nga babayi nga residente man sang Sipalay City ang kaupod nga nagpositibo apang wala pa masiguro ang status sini bangod wala makaupod sa kategorya sang LSI kag OFW ukon siya ang makabig nga indigenous case.
Samtang duha naman ang nadugang nga positibo sa COVID-19 sa Bacolod City nga ginalakipan sang 22 anyos nga lalaki kag 24 anyos nga babayi.
Samtang gincorrect naman sang DOH Region 6 nga si WV 563 nga COVID-19 case bulletin no. 109 sang Lunes nga residente sa banwa sang Murcia ang nareport na bilang WV 215 sadtong Hunyo 24 sa COVID-19 case bulletin no. 90.
Ang ginbulos nga si WV 563 amo ang 25 anyos nga babayi nga residente sang Kabankalan City.
Sa karun, nagdangat na sa 206 ang kabug-usan nga kaso sang COVID-19 sa Negros Occidental samtang 64 naman ang sa siyudad sang Bacolod.
