Ginkumpirmar ni Punong Barangay Rodolfo “Boy” Pico sang Barangay Mansilingan nga ginpaidalom na sa swab test kag naka-facility quarantine na ang asawa ni Bacolod Patient No. 53 nga isa ka 33-anyos nga lalaki kag locally stranded individual nagikan sa Manila.
Nahibaluan nga una na gin-sealed off ang balay ni Patient No. 53 sa Purok Grandville 3 sa amo nga barangay kasunod sang mga report nga ila nabaton nga nagagwa pa sa amo nga puluy-an ang asawa sang pasyente.
Madumduman nga naggwa ang resulta ni Patient 53 sang Hulyo 10 kun sa diin ginpaidalom lamang ini sa home quarantine.
Nangin una nga plano sang barangay nga ilockdown ang 30-meter radius sang amo nga lugar apang madamo nga mga pumuluyo ang nagpamatok diri.
Gani, ginpakamaayo na lamang nga kuhaon ang pasyente kag gin-isolate sa isa ka quarantine facility.
Nahibaluan nga may yara sang 50 ka mga informal settlers nga nagapuyo sa amo nga lugar.
Ginmanduan naman ang asawa kag ang miyembro sang pamilya sini nga magpaidalom sa home quarantine.
Suno kay Pico, kahapon sang aga gindala sa quarantine facility ang asawa ni Patient No. 53 kag ginpaidalom sa swab test.
Wala nalang ini ginpapauli kag hulaton nalang sini nga maggwa ang iya resulta.
Hugot naman nga ginapabilin sa home quarantine ang nabilin nga mga miyembro sang pamilya sa amo nga balay.
