Magapabilin sa idalom sang General Community Quarantine (GCQ) ang Metro Manila matapos nga gin-reject ni Presidente Rodrigo Duterte ang proposal nga ibalik ini liwat sa idalom sang Modified Enhanced Community Quarantine (MECQ) sumugod subong nga adlaw tubtob sa Hulyo 31.
Samtang, ang Cebu City naman ang ginbutang sa idalom sang MECQ.
Sa briefing sa Malacañang kagab-I, ginpahayag ni Presidential spokesman Harry Roque nga inisyal nga nagsugot si Presidente Duterte sa rekomendasyon sang mga eksperto nagikan sa University of the Philippines nga ibalik sa MECQ ang Metro Manila.
Apang, gin-apelar naman nanday Secretary Carlito Galvez Jr., chief implementer sang COVID-19 response sang gobyerno kag ni Interior Secretary Eduardo Año ang rekomendasyon.
Samtang, ginpaidalom naman sa medium risk Modified General Community Quarantine ang bug-os nga Western Visayas.
Suno kay Roque, sa medium risk MGCQ, mas bukas na ang ekonomiya.
Pero kinahanglan suno sa iya nga ipatuman gihapon sang mga LGUs ang regular lockdowns kun kinahanglan kag istrikto nga ipatuman ang minimum health standards.
Dapat man nga batunon ang tanan nga LSIs kag repatriated OFWs apang i-quarantine sila kag ipa-idalum sa RT-PCR test pag-abot sa ila lugar.
