Ginkumpirmar sang pinuno sang Talisay City Disaster Risk Reduction Management Office (CDRRMO) nga padayon pa ang ila search and rescue operation sa duha ka mga menor de edad nga padayon nga missing matapos maanod samtang nagapaligo sa Matab-ang River, Hda. Bacong, Brgy. Matab-ang, Talisay City sang Huwebes sang hapon.
Madumduman nga kahapon sang aga, nasapwan ang bangkay ni Janet Rodriguez, 15 anyos, residente sang Prk. Santol, Brgy. Mandalagan sa bahin sang Purok Tumpok, Barangay Zone 15, Talisay City nga yara sa bukana sang Matab-ang River.
Sa interview sang Bombo Radyo Bacolod kay Talisay CDRRMO head Jeffrey Gutierez, ginpahayag sini nga backpack nga may unod nga cellphone kag personal nga kagamitan pa lang ang ila nakuha nga ginapatihan ginapanag-iyahan sang mga biktima.
Suno diri, ang mga pamalay sa higad sang baybay ang nagturn over sini sa ila.
Ginpasalig naman ni Gutierez nga padayon sila nga magatinguha upod ang Bantay Dagat Talisay agud makit-an na ang duwa pa nga naanod nga sanday Jamarra Pahilagao, 15 anyos; kag Carl Gabriel Cabrillos, 17 anyos.
Ginkumpirmar naman sini nga may yara sang lagob sa agtang ang bangkay ni Rodriguez nga posible tuga sang pagkabunggo sini sa mga bato samtang gina-anod.
Yara na karon sa punerarya ang bangkay sang biktima.
