Kapin 600 mil pesos nga balor sang iligal nga druga ang nakuha sa ginpatigayon nga buybust operation sa Purok Paglaum, Barangay 17 ciudad sang Bacolod takna alas-10:20 kagab-i.
Ang mga suspetsado ang ginkilala kanday Zerlin Magbanua, 40-anyos kag residente sang Brgy. Zone 12-A, Talisay City kag isa ka high-value target; Jimbo Meniao, 23-anyos; kag Rene Yanson, 43-anyos kag lunsay mga residente sang Barangay Villamonte kag pareho nga street-level individuals.
Natigayon nga makuha sa ila paghinakop ang 20 tanan ka mga sachet sang suspected shabu, 25 ka bahin sang P1,000 bill nga marked money, P2,500 nga cash, homemade caliber .22 revolver, napulo ka mga caliver .22 revolver nga mga live ammunitions kag iban pa nga drug paraphernalia.
Ginabanta nga nagadangat sa 85 grams ang nakuha nga mga shabu nga nagabalor sang P578 mil.
Nakahunong karon ang mga suspetsado sa Bacolod Police Station 2 para sa nagakaigo nga disposisyon.
Samtang, arestado ang tatlo ka mga persona sa ginpatigayon nga buybust operation sang Regional Drug Enforcement Unit (RDEU) sa Purok Masagana, Barangay 6 ciudad sang Bacolod kagab-i.
Ginkilala ang mga suspetsado kanday Edgie Gidoria, Rustom Del Rosario kag Richard Munton.
Natigayon nga mabaklan ang mga ini sang isa ka elongated heat-sealed transparent plastic sachet sang suspected shabu kag nakuhaan pa gid sang dugang nga anom ka mga elongated heat-sealed transparent plastic sachet sang suspected shabu kag siyam pa gid ka mga dalagko nga sachet sang ginapatihan iligal nga druga.
Ginapahayag nga nakaagi na sadto nga ginpatigayunan sang buybust ang amo nga balay kun sa diin nadakpan ang tatlo ka mga suspetsado.
Priso karon ang mga ini sa Bacolod Police Station 2 kag natalana nga pasakaan sang kaso sa pagbayolar sang RA 9165 ukon Comprehensive Dangerous Drugs Act of 2002.
