Nalakip ang youngest ukon pinakabata nga nagpositibo sa COVID 19 sa probinsya sang Negros Occidental sa 32 ka recoveries kahapon.
Si WV 344 ukon ang duha ka bulan nga lapsag nga lalaki nagikan sa banwa sang Moises Padilla ang nakagwa na sa quarantine facility kahapon kaupod ang iya iloy matapos magnegatibo na sa repeat test.
Magluwas sa iya, nakarecover naman ang 14 anyos nga babayi nga residente sang Sagay City, Negros Occidental.
Samtang, nagdugang sang siyam ang positibo nga kaso sang COVID-19 sa Negros Occidental kahapon.
Ang mga panibag-o nga nagdugang ang ginalakipan sang 20 anyos nga lalaki nga residente sang banwa sang Hinobaan kag isa ka locally stranded individual (LSI), duha ka 21 anyos, 28 anyos kag 45 anyos nga mga lalaki nga residente sa Sagay City kag lunsay mga LSI, 37 anyos nga babayi nga residente sa banwa sang Murcia kag isa ka repatriated OFW, 30 anyos nga nga babayi residente sa banwa sang Hinigaran kag isa ka OFW, 36 anyos nga lalaki nga residente sa Silay City kag OFW kag ang 20 anyos nga babayi nga residente sa banwa sang Cauayan kag isa ka LSI.
Sa pihak nga bahin, may pito naman nga nakarecover sa siyudad sang Bacolod.
Sa karun, may yara na sang 255 ka mga kaso sang COVID-19 sa Negros Occidental kag nagapabilin naman sa 72 ang sa ciudad sang Bacolod.
Samtang, may yara na sang kabug-usan nga 716 ka mga kaso sa Western Visayas kun sa diin 359 ang active cases, 345 ang nakarecover kag 12 ang nagkalamatay.
