Pirmado na kahapon ang joint agreement sa tunga sang Bacolod City Water District (BACIWA) kag Prime Water Inc., isa ka pribado nga kumpanya.
Ang Joint Venture Project ang magalawig sang 25 ka tuig.
Suno sa kumpirmasyon ni Atty. Lorendo Dilag, Chairman of the Board sang BACIWA, ginpakamaayo nga magsulod sang mga ini sa kontrata sa Prime Water Inc. bangud indi na nila luyag nga mangutang.
Ginakinahanglan naman sang BACIWA suno sa iya nga magsulod sa kuntrata bangod ini ang mas makapaayo kag makabenipisyo sa mga pumuluyo sa Bacolod.
Ginklaro ni Dilag nga masarangan sang BACIWA nga magbayad sa mga empleyado kasubong man ang pagpakay-o sang mga guba nga tubo apang indi masarangan ang ekspansyon sa serbisyo bangud nagadamo ang populasyon.
Suno kay Dilag, tuman kadasig ang pagdamo sang populasyon, nagapatindog sang ginatos nga subdivisions kag ang pag-ulhot sang madamo nga condominium nga lunsay nagakinahanglan sang tubig.
Makabig naman nga inutil ang BACIWA kun indi masarangan ang ekspansyon kag ginakinahanglan ini sang kwarta.
May mga proposal naman sa water district nga mangutang sa bangko apang gilayon man nga ginreject.
Ginpahayag ni Dilag nga naka-agi ang mga ini nga mangutang sadto sang balor P500 million apang nagdangat sa bilyon ang ginbayaran sang mga ini kag nagdangat pa sa pagpasaka sang kaso.
Agud nga indi na magdangat sa loan suno kay Dilag, ginpakamaayo nalang sang BACIWA ang benipisyo sang stakeholders kag ang Prime Water ang nagdaog.
