Nagpatigayon sang indignation rally ang grupo nga Amlig Tubig agud pamatukan ang joint venture project sang Bacolod City Water District (BACIWA) kag Prime Water Inc.
Suno kay Councilor Wilson Gamboa Jr., ang indignation rally amo ang pagpabutyag sang kaugot kag kaakig nga repleksyon sang ginabatyag sang bilog nga pumuluyo sa Bacolod.
Suno kay Gamboa, gintago-tago sang mga ini ang nahanungod sa kuntrata kag wala man ginpahibalo bisan sa employees union ang contract signing kag negosasyon nga amo ang derekta nga maigo.
Ginalantaw nga magarender sang resignation ang kadamuan sa mga regular employees bangod igapressure ini sang Prime Water para sa forced resignation.
Ginabanta yara nalang sa 20 ang mabilin nga mga high level nga mga management employees.
Ginaakusahan man ni Gamboa nga pagtraidor ang ginbuhat nga kuntrata.
Madumduman nga gin-istoryahan man ang isyu sa public hearing kasubong sang isyu sa pinalagpat nga billing kag ang nahanungod kay Engr. Dave Villanueva kag Eduardo Ravena.
Nahibaluan nga nagapasugot man ang Land Bank para maghatag sang financial assistance sa pagrehabilitate sang water system.
Ginpanindugan ni Gamboa nga mahimu sang ahensya nga patigayunon ang mga proyekto pinaagi sa P2 billion nga loan, apang ginpilit gid nga iduso ang P7 billion contract sang tatlo ka Board of Directors.
Ginklaro ni Gamboa nga kun ang gobyerno ang magakapyot sang proyekto maseguro nga service oriented ini apang kun pribado na nga kumpanya ang magapanguna mangin profit oriented na ang prokyekto.
Sa nakita naman sini sa kuntrata, disbentaha ini sa mga pumuluyo.Samtang, nagapati ang convener sang grupo nga Water Watch nga privatization ang dangatan sang joint venture project sang Bacolod City Water District (BACIWA) kag Prime Water Inc.
Suno kay Wennie Sancho nga kaupod man sa grupo nga Amlig Tubig, nakibot sila kag wala nakahibalo nga may natabo na nga pirmahanay.
Kapierdihan naman sa pumuluyo sa pagtan-aw sini bangod wala man lang ginpahibalo ang kaundan sang terms of reference.
Wala naman sang konkreto nga basehan nga indi privatization ang natabo kun sa diin madula na ang control sa pagsaka sang water rate.
Posible naman nga daku ang mabatun sang mga empleyado apang madula na ang security of tenure.
Apisar nga may bahin ang BACIWA sa pagpalakad sang negosyo, magapabilin gihapon nga ang magamando amo ang pribado nga kumpanya.
Hugot nga ginapamatukan ni Sancho ang privatization bangod makabig nga public interest ang tubig kaangay man sa kuryente.
Panugyan ni Sancho sa mga empleyado sang BACIWA nga pamalabagan agud nga indi madayon ang kuntrata.
Sa oras nga magtake-over ang Prime Water, ginalantaw naman nga madula ang Labor Union.
Mabudlayan naman sa pagtukod sang union ang mga empleyado bangod ang nauna amo ang isa ka Public Sector Unionism apang sa karun mangin pribado na ang ahensya.
Kun luyag naman nga magpatukod sang labor union, magapaidalum ini sa Labor Code of the Philippines, apang indi gilayon nga mabatun sang mga empleyado ang benepisyo sang labor union sa malawig nga tinion bangod mabudlayan sa pagproseso karon nga may pandemic.
Ginpanindugan man ni Sancho nga kun ang paglantaw sa paghatag sang tubig sa publiko amo ang ginansya kag indi ang maghatag sang serbisyo, makabig na ini nga buluhaton sang pribado nga sektor. Sa pihak nga bahin, kumpirmado nga nakakas na bilang board of director sa Bacolod City Water District si Eduardo Ravena sumugod sini nga bulan sang Hulyo.
Suno kay ni Atty. Lorendo Dilag, Chairman of the Board sang BACIWA, nagsulat ang ombudsman sa ahensya angot sa desisyon sa ginapangatubang nga kaso ni Ravina nga humalin pa sang City Accountant ini.
Bangod diri, wala na sang nahimu ang watrer district kundi buy-an si Ravena.
Sa ebalwasyon naman ni Dilag, nangin maayo kag competent nga director si Ravena sa BACIWA kag nanugon man nga naseparar na ini sa ahensya.
Sa karon, apat nalang ang nabilin nga Board of Directors sa Bacolod City Water District nga ginalakipan nanday Atty. Lorendo Dilag, Engr. Dave Villanueva, Mona Dia Hardin kag Lorenz Villanueva.
Samtang nagapabilin naman sa sick status si Engr. Dave Villanueva nga matapos ang termino sini nga Disyembre.
Nagapabilin naman nga lima ang orihinal nga kumposisyon sang board of directors.
Wala naman makapartisipar sa mga board meeting nga ginapatigayon si Villanueva bangod sa balatian apang gina-imporma nalang ini sang hitabo sa kada meeting.
