Nadugangan ang numero sang mga pasyente matapos magbungguanay ang PUJ nga nagabyahe Bata-Libertad kag ambulance sang Sagay City sa intersection sang Dalan Lacson-Hernaez ciudad sang Bacolod kagab-i.
Sa interview sang Bombo Radyo Bacolod kay Johnny Bello, 27-anyos driver sang amo jeep kag residente sang Escalante City, ginpahayag sini nga nagulpihan man siya sa natabo.
Suno diri, wala siya maglaom nga mabunggu-anay sila sang ambulansya bangud nga naga-green pa man ang stoplight kag may nabilin pa nga 7 seconds antes mag-stop gani naghingagaw ini tabok sa dalan padulong sa downtown.
Dugang pa sang driver nga wala man sini natalupangdan ang ambulance nga nagdiretso bangud nga wala nagawang-wang ang siren sini.
Nahibaluan nga padulong kuntani sa Bacolod Adventist Medical Center ang ambulansya nga may sakay nga tatlo ka mga pasahero kun sa diin ang isa amo ang biktima sang hit-and-run.
Suno kay Bello, mahinay lamang ang padalagan sini kag indi man ini hubog.
Handa naman ang driver nga atubangon ang kaso pananglitan nga pasakaan ini siya ukon pwede man nga mag-aregluhanay sila.
Suno diri, nagapangayo gid siya sang pasaylo bangud nga indi man sini hungod ang natabo nga aksidente.
Suno kay Annisabelle Peralta, manghod ni Ma. Lisa Peralta nga kaupod sang pasyente nga pagadal-on kuntani sa BAMC, ang pasyente ang ginkilala kay Ma. Lottes Peralta nga biktima sang hit and run kag lunsay nagikan sa banwa sang Toboso.
Gilayon naman nga gindala sa BAMC ang mga pasyente kasubong man sa driver sang ambyulansya.
Suno naman kay Herbert Nietez, pasahero sa jeep nga nakabungo sa ambyulansya, yara lang sa 40 ang dalagan sang jeep.
Suno diri, may nabilin pa nga 7 seconds antes magstop ang sign sa stop light gani naghingagaw ang driver sang jeep sa pagtabok apang gulpyada nalang nga nag-ulhot ang ambulansya.
Lima ang pasahero sini kaupod sang isa nga nakasakay sa tupad sang driver.
Natam-an naman sa aksidente amo ang yara sa atubang samtang mga bukol lang ang naagom sang mga ini sa likod.
