Ginpaidalum sa lockdown ang pila ka mga area sa ciudad sang Bacolod bangod may mga nagpositibo nga pumuluyo.
Sa interview sang Bombo Radyo kay Bacolod City Vice Mayor El Cid Familiaran, isa ka balay ang ginlockdown sa Estancia Subdivision, Barangay Mandalagan; tatlo sa Purok Riverside, Barangay Banago; samtang 11 naman ka panimalay sa Purok Mahimulatun, Barangay Banago.
Nahibaluan nga nagpositibo ang isa ka nurse sa pribado nga ospital nga residente sa Estancia Subdivision kag naka-admit sa ospital.
Naka-ultra risk ang puluy-an sang pasyente kag nakahome quarantine ang pamilya.
Samtang isa naman ka OFW nga wala makadayun sa paggwa sa luwas sang pungsod nga nastranded sa Manila ang nagbalik sa Bacolod nga nagpositibo sa COVID-19 sa Purok Riverside, Barangay Banago.
Nagtaliwan naman ang isa ka senior citizen nga panday sa Purok Mahimulatun, Barangay Banago nga gilayon nga gin crimate sang Miyerkules kag nagwa nga positibo sang Biyernes.
Aminado si Familiaran nagakahangawa ini bangud suno sa iya, local ukon community transmission na ang nagakatabo.
Nagapati man ini nga importante ang contact tracing kag gilayon nga iga-isolate ang mga mahibaluan nga may physical contact sa positibo gani nagapangabay ini sa mga pumuluyo nga maghambal sang matuod.
