Ginkumpirmar ni Department of Social Welfare and Development(DSWD) Region 6 director Ma. Evelyn Macapobre nga magasugod na ang tagtaganay para sa second tranche sang Social Amelioration Program (SAP) sa Hulyo 23.
Sa press briefing nga ginpatigayon sini kahapon, iya ginpahayag nga na-finalize na sang DSWD-6 ang mga terms and conditions sa financial service provider nga Starpay.
Suno diri, ang Starpay ang maga-cover sa mga lugar sa Western Visayas nga nalakip sa second tranche magluwas lamang sa mga banwa sang Hinobaan, Ilog kag Cauayan sa Negros Occidental bangud ang RCBC ang maga-cover sa ila.
Dugang pa ni Macapobre nga ginahulat pa nila karon ang kumpirmasyon sang RCBC angot sa schedule bangud luyag sini nga dungan nga magsugod sa pagrelease ang duha ka mga financial service providers.
Suno sa regional director, managtag ang mga DSWD personnel sang Beneficiary Registration Number (BRN) sa mga beneficiaries agud ila nga dal-on sa pagclaim sang 6 mil pesos lakip na ang SAP form kag ID.
Magatapos naman ang tagtaganay sa Hulyo 30 bangud ginhatagan lamang sang ahensya sang pito ka adlaw ang mga financial service providers agud nga makumpleto ang payout.
Natalana naman subong nga adlaw nga magsapol ang DSWD-6 upod ang tanan nga mga local government units (LGUs) agud hambalan ang tagtaganay tuhoy sa second tranche sang SAP.
