Ginseal-off na ang balay sang isa ka utility worker sa General Services Office sa Purok Seaside, Brgy. Tangub, Bacolod City matapos magpositibo siya sa coronavirus disease 2019.
Sa interview sang Bombo Radyo kay Punong Barangay Noli Villarosa, nagapangasubo ini bangud nahibaluan nga ang nasambit nga pasyente ang naglagaw pa matapos makuhaan sang swab test sang Hulyo 17.
Suno kay Villarosa, sang ginpahibalo ini ni Councilor Em Ang nga nagpositibo ang isa ka residente sa ila barangay, gilayon ini nga nagpatawag sang emergency meeting sa 33 ka mga pamilya sa Purok Seaside kun sa 144 ka mga residente ang nagapuyo.
Suno sa iya, ginsiraduhan ang within 30 meters sang balay sang pasyente kag hugot nga ginabantayan ang 13 ka mga upod sini sa puluy-an.
Nahibaluan man suno sa iya nga nagpalutay pa ang mga katigulangan sa ila balay gani gin-abisuhan man sini ang manuglutay nga indi anay maglagaw.
Nagapadayon man ang contact tracing sang mga opisyales sa posible nga napalapitan sang pasyente.
Suno kay Villarosa, magapagwa sila sang pondo nagikan sa barangay para sa isa ka semana nga pagkaon sang mga naapektuhan sang pagseal-off sang balay.
Nag-abiso man ini sa mga pumuluyo sang Brgy. Tangub nga indi magpanic kag magkooperar lang bangud hugot man nga nagabantay ang mga opisyales sang barangay.
