Ginakalipay ni Bacolod City Lone District Congressman Greg Gasataya ang kumpirmasyon sang Department of Social Welfare and Development Region 6 nga nadownload na kahapon ang pondo para sa second tranche sang Social Amelioration Program (SAP) cash assistance para sa mga benepisyaryo sa ciudad sang Bacolod.
Sa interview sang Bombo Radyo kay Gasataya, ginpahayag sini nga nadownload na kahapon sang hapon ang P455.5 million nga SAP cash assistance para sa 75,926 ka mga benepisyaryo sa ciudad.
Suno sa iya, lauman nga sa Huwebes magasugod na ang pagpanghatag sang 2nd tranche nga ayuda.
Nagapati man ang kongresista nga may yara sang separado nga pondo kag sistema ang DSWD para sa mga left-out beneficiaries ukon ang mga wala nadala sa first tranche bangud suno sa iya, ang nadownload ang pondo ang para lang anay sa malapit 76,000 ka mga benepisyaryo.
Nagalaom si Gasataya nga ang ini nga grasya ang makabulig gid sa sitwasyon sang mga Bacolodnon ilabi na ang mga nawad-an sang palangabuhian.
