Nalakip ang anom ka bulan nga lapsag nga babayi kag isa ka tuig nga bata nga lalaki sa 35 ka mga Negrosanon nga nagpositibo sa COVID 19 kag nagdugang sa probinsya sang Negros Occidental kahapon.
Sa COVID-19 Case Bulletin No. 118 nga ginpagwa sang Department of Health kahapon, 47 ka dugang nga mga kaso ang narekord sa Western Visayas kun sa diin 35 diri ang nagikan sa probinsya, samtang isa diri ang nagikan sa ciudad sang Bacolod.
Sa nasambit nga numero, tatlo ang nagikan sa Victorias City; duha sa ciudad sang Silay; tatlo sa Bago City; duha sa Moises Padilla; isa sa La Castellana; isa sa Cauayan; isa sa Hinoba-an; tatlo sa Calatrava lakip ang isa ka tuig nga bata nga lalaki; tatlo sa Hinigaran; duha sa ciudad sang Cadiz; isa sa San Carlos; isa sa Escalante, duha sa Kabankalan; lima sa Sagay; duha sa Murcia kun sa diin nalakip ang anom ka bulan nga lapsag nga makabig indigenous case; isa sa Manapla; kag isa sa banwa sang Binalbagan.
Ang 31-anyos naman nga lalaki nagikan sa banwa sang Murcia ang indigenous case man, samtang ang nabilin nga 33 ang mga locally stranded individuals, lakip naman ang 24-anyos nga lalaki nagikan sa Bacolod.
Sa karun, yara na sa 307 ang kabug-usan nga kaso sang COVID-19 sa Negros Occidental samtang 93 naman ang sa ciudad sang Bacolod.
