13 ka panibag-o nga mga kaso sang coronavirus disease ang narekord sa Negros Occidental samtang duha naman sa ciudad sang Bacolod.
Sa COVID-19 Case Bulletin No. 122 nga ginpagwa sang Department of Health kahapon, ang mga locally stranded individuals nga nagpositibo sa probinsya ang ginalakipan sang duha nagikan sa banwa sang La Castellana; isa sa Himamaylan; isa sa Victorias; isa sa Valladolid; isa sa Toboso; isa sa Kabankalan; kag isa sa Sagay.
Samtang, lunsay mga indigenous cases naman ang isa ka pasyente nagikan sa Isabela; isa sa Sipalay; kag duha sa Talisay.
May isa naman ka authorized person outside resident (APOR) sa Sipalay nga nagpositibo man sa virus.
Ang 42 anyos nga babaye kag 46 anyos nga babaye naman nagikan sa ciudad sang Bacolod ang lunsay mga indigenous cases man.
Pito naman ka mga pasyente nagikan sa probinsya ang nadugang sa mga recoveries kahapon.
Sa karun, may yara na sang 408 ka mga kompirmado nga kaso sang COVID-19 sa Negros Occidental samtang 150 naman sa ciudad sang Bacolod.
Kaangot sini, temporaryo nga ginsuspendi ni Mayor Evelio “Bing” Leonardia ang sea travel halin Bacolod City padulong sa Iloilo City epektibo alas 11:59 kagab-i until further advice.
Sa statement nga ginpagwa ni Leonardia, ginkumpirmar ni Iloilo City Mayor Jerry Treñas nga temporaryo man sini nga ginsuspendi ang sea travel nagikan sa ciudad sang Iloilo padulong sa Bacolod epektibo subong nga adlaw.
