Ginbawian sang kabuhi ang 77 anyos nga lalaki kag residente sang San Carlos City, Negros Occidental kahapon bangud sa komplikasyon sang coronavirus disease 2019.
Sa interview sang Bombo Radyo Bacolod kay Provincial Health Officer Dr. Ernell Tumimbang, boat captain ang pasyente kag nagabiyahe sa routa nga San Carlos City-Cebu vice versa.
Suno kay Tumimbang, sang Hulyo 20 indi maayo makaginhawa ang pasyente gani gin-admit ini sa San Carlos City Hospital kag ginpaidalom sa swab test apang sang Hulyo 23, ginrefer ini sa Corazon Locsin Montelibano Memorial Regional Hospital (CLMMRH).
Nagwa ang resulta sang swab test sang Hulyo 24 kag positibo ini sa COVID-19.
Kahapon nga adlaw, ginbawian ini sang kabuhi sa regional hospital.
Ini man ang labing una nga fatality sa probinsya sang Negros Occidental.
Temporaryo naman nga ginpa-angkla sa dagat sang San Carlos City ang barko nga ginatrabahuan sang pasyente agud maisolate ang mga crew.
May yara naman sang 50 ka mga naclose contact sang pasyente nga ginalakipan sang nurses kag doctors nga nagaduty sa San Carlos City Hospital.
Suno kay Tumimbang, wala man sang dapat kahangaw-an ang mga pumuluyo apisar nga may yara sang nagtaliwan kag nagpanawagan sa publiko nga sundon ang mga health protocols.
