Duha na sa apat ka mga persona nga namissing sang Martes sang hapon matapos maanod sa suba sa Moises Padilla, Negros Occidental ang naretrieve sang mga otoridad.
Madumduman nga nagikan sa banwa sang Hinigaran ang duha ka mga tricycle nga may kabug-usan nga sakay nga onse ka mga tawo kag nagtambong sa kaadlawan sang ila himata.
Mataas ang lebel sang tubig sang nag-abot ang mga ini sa overflow sa Binalbagan River sa Barangay Montilla, Moises Padilla gani nagdesisyon ang anum nga sakay sa isa ka tricycle nga magtabok paagi sa hanging bridge samtang nagpadayon naman ang isa ka tricycle nga may sakay nga lima ka tawo.
Antes pa man makaabot ang tricycle sa tunga sang overflow, gin-anod ini sang mabaskog nga tubig kag isa lang ka pasahero ang nakaluwas nga ginkilala kay Roldan Banaag Jr.
Makaligad ang dose oras, nasapwan sang mga rescue teams ang bangkay ni Danilo Banaag, 17-anyos, sa bahin sang suba nga sakop na sang Barangay Guimpaanan, Moises Padilla, pasado alas-8:00 kahapon sang aga.
Sa interview sang Bombo Radyo kay Reynald Horegue, Local Disaster Risk Reduction and Management Office Head sang Moises Padilla, nasapwan naman si Roldan Banaag Sr., 50 anyos kag amay ni Roldan Jr. kag tiyo ni Danilo sang Miyerkules sang hapon.
Nagalaom man si Horegue nga makit-an naman sanday Edmund Samson, 17 anyos kag Jovelyn Banaag, 48 anyos nga asawa ni Roldan Sr., kag kuntani nakaluwas ang mga ini.
Sa karun, nagapadayon pa ang search and retrieval operations sang Disaster Risk Reduction and Management Office sang Moises Padilla, Isabela, La Castellana, Hinigaran kag Binalbagan.
