90% na sang mga naka-close contact sang 77-anyos nga boat captain nga residente sang San Carlos City, Negros Occidental nga nagtaliwan bangud sa coronavirus disease ang nacontact trace sang mga otoridad.
Madumduman nga ang pasyente ang kapitan sang barko nga nagabiyahe San Carlos City-Cebu vice versa.
Sang Hulyo 20, indi maayo makaginhawa ang pasyente gani gin-admit ini sa San Carlos City Hospital kag ginpaidalom sa swab test apang sang Hulyo 23, ginrefer ini sa Corazon Locsin Montelibano Memorial Regional Hospital (CLMMRH).
Nagwa ang resulta sang swab test sang Hulyo 24 kag positibo ini sa COVID-19.
Sang Hulyo 27, ginbawian ini sang kabuhi sa regional hospital.
Ini man ang labing una nga fatality sa probinsya sang Negros Occidental.
Sa interview sang Bombo Radyo kay San Carlos City Mayor Renato Gustilo, 90% na sa mga nakapalapit sa pasyente ang ila nacontact trace kag sa karun ginapaidalum sa quarantine.
Suno sa iya, natalana nga magpaidalom sa swab testing ang mga natungdan.
Suno sa alkalde, ginpatawag man ang tanan nga crew sang shipping line kag ginquarantine sa barko.
Nagapreparar man sila sang evacuation center kag itransfer ang pila ka mga crew agud indi sila magginutok sa barko.
Nagalaom man si Gustilo nga ang 10% nga nakacontact sang pasyente nga wala pa nila nakit-an, kuntani negatibo lang sa virus agud indi makalaton.
Gin-athag naman sang pinuno sang Provincial Health Office nga fake news ang nagalapta nga balita nahanungod sa pagpositibo sa COVID-19 sang doktor sa ciudad sang San Carlos, Negros Occidental.
Suno kay Dr. Ernell Tumimbang, ang una nga nagtaliwan sa probinsya nga 77 anyos nga kapitan sa barko ang residente sang ciudad sang San Carlos kag nagabyahe sa sang routa nga Toledo, Cebu-San Carlos vice versa.
Matuod-tuod naman nga may mga ginswab test nga mga personnel sang ospital sa San Carlos, apang wala pa makagwa ang resulta.
Samtang nahibaluan naman nga ang ginapagwa nga nagpositibo amo ang doktor nga nag-atipan mismo sa pasyente, apang ginaseguro ni Tumimbang nga fake news lang ini.
