Muslim community sa Bacolod, nag-obserbar sang physical distancing sa pagselebrar sang Eidl Adha subong nga adlaw

Wala napunggan sang pandemiya ang pagselebrar sang Muslim Community sa syudad sang Bacolod sang Eid al-Adha ukon Feast of Sacrifice subong nga adlaw.

Sa interview sang Bombo Radyo Bacolod kay Imam Omar Betita, Muslim Leader sa idalom sang DAR-AL-DHKR Islamic and Guidance Center sa Barangay Mansilingan, ang pagselebrar sang Eid al Adha amo ang pagdumdom sa kabubut-on ni Ibrahim sa pagsakripisyo sang anak sini nga si Ismael bilang pagkamasinulundon sa mando sang Ginoo.

Ginpahayag sini nga ginselebrar nila ang balaan nga kapiyestahan paagi sa pagpangamuyo kag pag-ihaw sa hinuptanan nga kanding.

Nag-obserbar man sila sang social distancing sa pagpangamuyo paagi sa pagdala sang tagsa tagsa ka mga praying mat.