Suportado sang 3rd Infantry Spearhead Division sang Philippine Army ang masunod nga chief of staff sang Armed Forces of the Philippines (AFP) nga si Lt. Gen. Gilbert Gapay nga magapungko sa pwesto sa Agosto 3, 2020.
Suno kay 3rd ID spokesperson Major Cenon Pancito III, maayo nga persona ang pagkakilala nila kay Gapay nga nagapungko sa karon bilang commanding general sang Philippine Army.
Positibo naman si Pancito nga sarang mahimu ni Gapay ang posisyon nga pagpanguna sa AFP kasubong man sa air force, navy kag iban pa nga mga branch of services nga pagakapyutan sini sang nagakaigo kag maayo.
Nabatyagan man sang mga ini kun paano ginsulong ni Gapay ang misyon sang organisasyon kag ang kaayuhan sang mga ginapangunahan nga mga suldado sadto kag nagapati ang mga ini nga amo man ang mabatyagan sang mga katapo sang AFP.
Ginsiguro naman ni Pancito nga magapabilin nga himuon sang 3rd ID ang estratrehiya kag mga buluhaton nga ginpakigbahin ni Gapay bilang anay pinuno sang mga ini.
Nahibaluan nga si Gapay ang kabahin sang Philippine Military Academy Sinagtala class of 1986 kag nangin valedictorian sang batch.
Nakilala man si Gapay sa ikasarang sa pagpatigayon sang mga operasyon, kaalam sa military operations, edukasyon, training kag sa human resource.
May pilosopiya man ini nahanungod sa pagpasanyog sang pagkilala sa men in uniform agud nga mapabilin ang kredibilidad sang serbisyo.
Samtang ginpahayag man ni Pancito nga wala pa sang order nga ginpagwa nahanungod sa magabulos sa mabayaan nga posisyon ni Gapay sa Army nga una na nga ginpahayag nga pagabuslan ni Lt. Gen. Cirilito Sobejana nga pinuno sa karon sang Western Mindanao Command.
