Padayon pa ang pagconsolidate sang Bacolod Traffic Authority Office (BTAO) sa numero sang mga naglapas sa no barrier, no backrider policy kadungan sang una nga adlaw sang implementasyon sini.
Nahibaluan nga apisar madamo ang nagapamatok, ginsugudan na subong nga adlaw ang pagpanakop sa mga nagaangkasanay sa motorsiklo nga wala sang barrier bisan asawa ukon live-in partner ang backrider.
Sa interview sang Bombo Radyo Bacolod kay BTAO Head Police Lt. Col. Luisito Acebuche, ginpahayag sini nga nagatuman lamang sila sang ginamando sang National Inter-Agency Task Force (IATF).
Suno kay Acebuche, ang mga madakpan ang pagahatagan sang citation ticket kag nakadepende ang pagabayaran nga multa sa magadakop diri.
Sa tion nga ang personnel sang BTAO ang makadakop sa naga-angkasanay, may multa ini nga P500 sa First Offense, P1000 sa Second Offense kag P1500 sa Third Offense kag sa ikaapat, irecommend na sa Land Transportation Office (LTO) para sa revocation sang driver’s license.
Mahimo naman nga mabayaran sang mga nadakpan ang multa sa Bacolod Government Center, sa Old City Hall ukon sa BTAO office sa BCPO.
Samtang, sa tion naman nga TOP ukon Temporary Operators Permit sang LTO ang iga-isyu sa madakpan, mahimo nga magdangat sa P10 mil ang multa.
Nagahingyo naman si Acebuche sang mga motorista sang kooperasyon agud indi sila madakpan kag mamultahan bangud nagasunod lamang sila sang mando.
Kaina sang udto, ginpahayag ni Acebuche nga madamo sila sang nadakpan apang kinahanglan pa nga iconsolidate.
Indi lamang motorsiklo suno sa iya ang ila ginadakop apang nalakip man diri ang mga tricycle nga wala naga-obserbar sang social distancing.
Gilayon ang mga ini ginaisyuhan sang citation ticket para sa multa.
