Gina-ugyunan sang business sector ang bag-o nga ginpagwa nga Executive Order sang alkalde apisar nga mas ginpalawig pa ang curfew, subject sa approval sang Sangguniang Panlungsod.
Sa interview sang Bombo Radyo Bacolod kay Metro Bacolod Chamber of Commerce and Industry (MBCCI) chief executive officer Frank Carbon, ginpahayag sini nga santo sa personal nga panan-awan sini dapat magahatag sang cash for work ang Local Government Units (LGUs) para sa mga tawo nga nawad-an sang ubra agud makaumpisa liwat sang ila palangabuhian kag kun may yara na, iga-implementar na ini.
Ginpahayag man sini nga ang mga kapulisan nga yara sa tagsa ka police station nga igadeploy sa traffic congested areas kun sa diin nagaginutok kag wala naga-obserbar sang health protocols kaangay sang pagsuksok sang facemask kag social distancing.
Suno diri, mas maayo nga uniformed personnel ang ideploy agud magbantay bangud lain ang respeto sang mga tawo sa ila.
Samtang ang police station ang butangan sang civillians kag gamiton ang mga force multipliers agud magbantay sang mga purok, sitios kag mga baranggay.
Nagapati man ini nga ginahimo lamang sang gobyerno ang nagakadapat nga himuon para sa health kag peace and order gani dapat tanan ang magasunod.
Dapat man mangin responsable suno sa iya ang tagsa ka tawo sa pagsunod sang mga health protocols agud madasig matapna ang paglapta sang virus.
Wala man sang problema sa iya ang malawig nga curfew nga halin alas-8:00 sa gab-i tubtub alas-4:00 sang kaagahon bangud nagapati man ini nga sa tion nga magdulom, madamo sang katuntuhan nga nagakatabo.
Ginpasalamatan man sini ang local executives sa pagpabilin sang syudad sa Modifiied General Community Quarantine apisar nga may yara sang gindugang nga restrictions.
