Handa nga magbulig sa pagpatigayon sang Brigada Eskwela ang katapo sang Bacolod City Police Office (BCPO) sa tion nga madayon ini apisar nga wala sang face to face learning subong nga tuig.
Sa interview sang Bombo Radyo Bacolod kay BCPO spokesperson Police Lt. Col. Ariel Pico, ginpahayag sini nga sa pag-abot sang new normal, kalabanan nga mga eskwelahan ang wala nagapatigayon sang face to face learning apang kinahanglan sa gihapon ipabilin ang katinlo sang tagsa ka mga eskwelahan.
Santo sa pahayag ni PNP Chief Police General Archie Gamboa nga sa traditional Brigada Eskwela, magapatigayon ang police sang gamay nga pagrepair sang eskwelahan apang limitado lang ang magpatigayon sini agud maobserbar ang health protocols kaangay sang social distancing.
Ginpahayag man sini nga sa tion nga madayon ang traditional Brigada Eskwela, mahimo makapadala ang BCPO sang lima tubtob anom ka personnel nagikan sa tagsa ka police station sa pagpaninlo bangud magluwas sa ginapatigayon nga task force disiplina, indi man sini luyag nga sila mismo ang magasupak sang health protocols.
Ginkompirmar man ni Pico nga may yara na sila sang preparasyon para sa pagpatigayon sang Brigada Eskwela.
