Temporaryo nga ginlockdown ang south wing sang Negros Occidental Provincial Capitol humalin kaina sang aga kasunod sang report nga nagpositibo sa COVID-19 ang duha ka empleyado nga diri nagaopisina.
Gilayon naman nga ginpatigayon ang disinfection kadungan sang lockdown nga ginpatuman.
Sa interview sang Bombo Radyo Bacolod kay Renelo Lastierre, head sang security and safety division sang Provincial Capitol kag vice president sang Provincial Alliance of Capitol Employees (PACE), technical staff sang Sangguniang Panlalawigan (SP) ang isa nga nagpositibo sa Covid-19 kun sa diin nalakip man ang opisina sa ginlockdown.
Suno diri, samtang nakalockdown ang south wing igadisinfect ang lugar.
Nagapatigayon naman sang contact tracing ang Provincial Health Office (PHO) agud mahibaluan ang napalapitan sang pasyente.
Sa south wing makita ang opisina sang vice governor kag administration office.
Hulaton naman nga madisinfect ang building antes makabaton liwat sang kliyente kag mga empleyado.
Ginpahayag man ni Lastierre nga ginaedukar man nila ang mga empleyado sang Kapitolyo agud may ihibalo sang safety protocols sa pagbaton sang mga kliyente kag mga luyag nga magtransak sa Kapitolyo.
Hugot naman nga ginapatuman sa kapitolyo provincial ang health protocols kaangay sang pagdumili nga makasulod ang wala sang ginasuksok nga face mask.
Kaina sang udto, ginseal off man ang pila ka mga balay sa Barangay 14, Bacolod City matapos magpositibo sa coronavirus ang isa ka barangay kagawad kag ang iya utod.
Samtang isa man ka empleyado sa Public Order and Safety Office nga residente man sang Barangay 14 ang nagpositibo sa COVID-19.
Subong nga adlaw naggwa ang resulta sang COVID test sang tatlo.
