Nakarecord sang pinakauna nga media man nga nagpositibo sa COVID-19 ang ciudad sang Bacolod.
Suno kay Bacolod City Councilor Renecito Novero, kahapon lang mahibaluan nga positibo sa virus ang nasambit nga media man. Nagsuprer naman ini sang pag-ubo sang tinalikdan nga adlaw.
Ginadal-an man ini sang pagkaon nga may vitamin C agud nga may pambato ang lawas sa balatian, kag naghatag man sang alcohol kag tubig.
Sa karun, nadula na ang ubo sini kag makabig na nga asymptomatic samtang nakaquarantine sa isa sa mga eskwelahan sa ciudad.
Kadungan sang pagpositibo sang media man, gilayon man nga gin-lockdown ang Negros Press Club (NPC) bangod naexpose ang isa ka staff sa pasyente.
Sa press release nga ginpagwa sang presidente sa NPC nga si Glazyl Masculino, nag-apelar ini sa mga pumuluyo nga maghalong ilabi na sa karun nga may-ara na sang local transmission.
Ginkumpirmar man sini nga isa sa mga staff ang naexpose sa isa ka positibo sa COVID-19.
Ginpaidalum naman ini sa rapid test kahapon sang aga kag naggwa naman ang resulta sang hapon kun sa diin nakumpirmar nga non-reactive na ini sa virus.
Agud makasiguro, temporaryo nga nagsirado ang NPC sumugod kahapon.
Nag-abiso man ini sa mga nakabisita sa opisina sang NPC sumugod Hulyo 29 tubtob sa karun nga magpaidalom sa home quarantine samtang ginahulat pa ang resulta sang swab test sang staff.// Nakaschedule naman para sa disinfection ang NPC building.
