Aminado ang coordinator sang Alternative Learning System sa probinsya sang Negros Occidental nga indi na bag-o ang sistema sa pagtudlo subong nga new normal bangud antes pa man ang pandemya, ginagamit na ini ALS.
Sa interview sang Bombo Radyo Bacolod kay Arnie Pampora, Education Specialist 2 sang Department of Education (DepEd) Negros Occidental kag ALS Coordinator for Cluster 3, ginpahayag sini nga may yara man sila sang ginpatigayon nga survey agud mahibaluan kun ano nga modules ang ila mas pilion bangud may yara na sila sang mga modalities nga ginagamit: ang online learning, radio-based instruction kag modular.
Suno diri nakita sa resulta sang survey nga mas ginapili sang mga estudyante ang modular learning.
May yara naman sila sang daan nga mga modules nga ireproduce na lamang agud mahatag sa mga estudyante.
Suno kay Pampora, sa tion nga mag-umpisa na ang klase, may yara sila sang gintumod nga lugar agud butangan sang duha ka drop box.
Ang isa ang butangan sang mga modules kag worksheets kun sa diin sulatan sang mga sabat sang estudyante kag ang isa ang butangan sang mga modules kag worksheets nga may yara na sang sabat.
Kabahin ini sang safety measures nga ginapatuman sang DepEd batok sa coronavirus.
Ang makuha naman sang mga worksheets ang tiglawas sang grupo sang mga estudyante.
Samtang, may yara naman sang mga recorded episode sang radio based instruction nga ginahimo ang ALS kun sa diin ginalawag paagi sa trumpa ang tulun-an sang mga estudyante.
