Wala gid sang nangin problema ang team leader sang City Legal Office nga na-assign sa Libertad Public Market angot sa kooperasyon sang mga vendors kadungan sang una nga adlaw nga pagpanirado sa tatlo ka dalagkuan nga merkado sa ciudad sang Bacolod.
Nahibaluan nga sa executive order No. 50 nga ginpagwa ni Mayor Evelio “Bing” Leonardia, nakasaad diri nga pagasiraduhan para sa disinfection ang Libertad Market, Burgos Market kag Central Market sa Agosto 9 kag Agosto 16.
Sa interview sang Bombo Radyo kay Edwin Legaspi, ginpahayag sini nga wala sang nangin problema sa pagsirado sang Libertad Public Market kahapon.
Suno diri, nagakooperar gid ang tagdumalahan sang merkado subong man ang mga vendors.
Aminado man ini nga may yara gid man sang nagbukas nga mga baligyaan sang Dominggo sang kaagahon apang sang pag-abot nila mga alas-5:00 sang aga, gilayon nila ini nga ginsaway kag nagsunod man ang mga manugbaligya.
Ginalauman naman ni Legaspi nga madamo ang maninda subong nga adlaw bangud sa pagsirado kahapon.
Sa karon magahulat nalang ang ila grupo sa dugang nga mando sang city government pananglitan nga padayunon pa ang disinfection kada Dominggo pagkatapos sang Agosto 16.
