Bangud ginsaway sang magahod nga sound, gintiro sang manugbantay sang baboy kag manok ang iya kasilingan sa Prk. Monico Ville, Brgy. Cabug, Bacolod City kagab-i.
Sa interview sang Bombo Radyo Bacolod kay Police Lt. Jonito Pastrana, station commander sang Police Station 9, ginpahayag sini nga nakahunong na sa nasambit nga police station ang suspetsado nga si Peter Allera, 19 anyos, single kag residente sang nasambit nga barangay.
Suno kay Pastrana, may yara na nga daan nga hiligut-anon nga nagapatunga sa duha kag nadugangan pa sang wala nagpamati ang suspetsado sang ginsaway sang biktima nga si Jolito Lambayong bangud sa matunog sini nga sound.
Nagagwa sa imbestigasyon sang police nga nagapungko ang biktima kag yara sa impluwensya sang makahulubog nga ilimnon sang ini ang hinali nga gintiro sang suspetsado gamit ang sulpak.
Nakaagom sang pilas sa idalom sang hawak ang biktima kag padayon nga ginabulong sa Corazon Locsin Montelibano Memorial Regional Hospital (CLMMRH).
Suno pa kay Pastrana, natabuan man nga yara sila sa area sang nabaton nila ang report gani gilayon sila nga nagpadulong sa lugar kag naaresto nila ang suspetsado sa Purok Saturn, Brgy. Handamunan, Bacolod City.
