Nadugangan kahapon sang 23 ang kaso sang COVID-19 sa probinsya sang Negros Occidental samtang 12 naman ang nagdugang sa ciudad sang Bacolod.
Sa COVID-19 case bulletin no. 137 nga ginpagwa sang Department of Health (DOH) Region 6, nagdangat na sa 2,307 ang kabug-usan nga kaso sang COVID-19 sa Western Visayas; 1,203 sa mga ini ang aktibo nga kaso sa pagdugang sang 178 nga ginalakipan sang 93 sa Iloilo City, 40 sa Iloilo Province, 23 sa Negros Occidental, 12 sa Bacolod City, tatlo sa Guimaras, duwa sa Aklan kag isa sa Capiz.
Samtang 1,071 naman ang mga recoveries sa pagdugang sang 36 kahapon kag nagdangat na sa 33 ang mga nagtaliwan sa pagdugang sang isa.
Ang panibag-o nga narecord nga nagtaliwan tuga sa virus amo ang 29 anyos nga lalaki nga residente sa ciudad sang Bacolod.
Sa 178 nga panibag-o nga kaso sa rehiyon, 13 diri ang locally stranded individuals (LSI), anom ang returning overseas Filipino (ROF), duwa ang authorized person outside residence (APOR) samtang ang 157 naman ang lunsay mga local cases.
Isa naman sa narecord sa probinsya amo ang senior citizen nga 92 anyos nga babayi, residente sa Himamaylan City kag nakapaidalum sa home quarantine.
Sa karun, ang Bacolod City ang nakarecord na sang kabug-usan nga 396 ka mga kaso sang COVID-19 samtang nagdangat naman sa 700 ang kaso sa probinsya sang Negros Occidental.
