Nagpositibo sa coronavirus ang alkalde sang banwa sang EB Magalona diri sa Negros Occidental.
Sa impormasyon nga nakuha sang Bombo Radyo, kahapon naggwa ang resulta sang COVID test ni Mayor Marvin Malacon nga siya ang positibo, kaupod ang pila ka miyembro sang iya pamilya.
Bangud sini, si Malacon ang labing una nga alkalde sa Negros Occidental nga nagpositibo sa COVID.
Kahapon nga adlaw, 22 ka bag-o nga mga kaso ang narekord sa Negros Occidental samtang nalakip naman ang walo ka bulan nga lapsag sa pito ka dugang nga mga kaso sang COVID-19 sa ciudad sang Bacolod.
Sa COVID-19 Case Bulletin No. 138 nga ginpagwa sang Department of Health Western Visayas, lunsay mga local cases kag nakafacility quarantine ang pito ka mga pasyente nagikan sa Bacolod nga nagpositibo sa coronavirus disease.
Ini ang ginalakipan sang isa ka walo ka bulan nga lapsag nga babaye; 23 anyos nga babaye; 43 anyos nga lalaki; 78 anyos nga babaye; 43 anyos nga lalaki; 22 anyos nga lalaki; kag 43 anyos nga lalaki.
Samtang 21 naman ang local case nga nagdugang sa probinsya kag ini ang ginalakipan sang walo sa La Carlota City; isa sa Talisay City; duha sa EB Magalona; pito sa Silay City; isa sa Valladolid; isa sa Bago City; kag isa sa Binalbagan.
Isa man ka locally stranded individual nagikan sa Bago City ang nagpositibo.
51 ka mga recoveries ang narekord sa Western Visayas kag isa diri ang nagikan sa Talisay City, Negros Occidental.
Sa karun, ang Bacolod City ang nakarecord na sang kabug-usan nga 403 ka mga kaso sang COVID-19 samtang nagdangat naman sa 722 ang kaso sa probinsya sang Negros Occidental.
